Kryeministri i Republikës së Greqisë, Aleksis Cipras, sot i dërgoi mesazh urimi kryeministrit të Republikës së Maqedonisë, Zoran Zaev, me rastin e marrjes së detyrës kryeministrore.
Sipas njoftimi të Qeverisë së Republikës së Maqedonisë, në mesazhin e urimit kryeministrit Zaev i është shprehur dëshira për sukses.
“Republika e Greqisë mbetet e përkushtuar në promovimin e stabilitetit, sigurisë dhe bashkëpunimit në Evropën Juglindore. Në bazë të kësaj, Qeveria ime është e gatshme të bashkëpunojë ngushtë me Qeverinë tuaj, me qëllim që ta përforcojmë bashkëpunimin tonë bilateral dhe marrëdhëniet tona, duke i përfshirë përmes masave vijuese për ndërtimin e besimit”, qëndron në urimin e kryeministrit grek dërguar kryeministrit maqedonas.
Në vijim theksohet se Cipras pret që Qeveria e re të tregojë politikë të vendosur që të punohet në promovimin e agjendës pozitive në marrëdhëniet bilaterale.
“Jam i bindur se Qeveria juaj do të tregojë vendosmëri politike që të punojë në promovimin e agjendës politike, duke i lënë pas njëherë e përgjithmonë anakronizmat e së kaluarës dhe duke u fokusuar në të ardhmen e vendeve tona. Jam në pritje të bashkëpunimit të afërt me ju”, theksohet në urim.
Kujtojmë se Kuvendi i Republikës së Maqedonisë, më 1 qershor, në seancën në të cilën në rend dite ishte zgjedhja e Qeverisë, me 62 “pro”, 44 “kundër” dhe 5 “të përmbajtura” zgjodhën Qeverinë e re të Republikës së Maqedonisë që do të udhëhiqet nga Zoran Zaev./AA
Na shkruani në WhatsApp
Discussion about this post